जनप्रतिनिधिमाथि धम्की सहित राजीनामा माग भएकोप्रति बुद्धभूमि नगरपालिकाको चिन्ता

हालै भाद्र २३ र २४ गते भएको Gen Z आन्दोलन का क्रममा भएको विभिन्न घटनाबारे बुद्धभूमि नगरपालिकाले औपचारिक विज्ञप्ति सार्वजनिक गरेको छ। नगरपालिकाका प्रवक्ता तेज बहादुर बस्नेतले सोमबार जारी गरेको विज्ञप्तिमा शान्तिपूर्ण आन्दोलनलाई अराजक बनाउन खोज्ने गतिविधिप्रति गम्भीर चिन्ता व्यक्त गरिएको छ।

 

 विज्ञप्तिमा आन्दोलनमा सहभागी भाइबहिनीहरूको मृत्युमा श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको शुभकामना व्यक्त गरिएको छ। तर, आन्दोलनको नाममा केही अराजक समूहले राष्ट्रिय ऐतिहासिक सरकारी भवनमा तोडफोड, निजी सम्पत्तिमा क्षति तथा आगजनी गरेर हानी पुर्‍याएको भन्दै यसबारे गहिरो छानबिन गरी दोषीमाथि कडा कारबाही गर्न माग गरिएको छ।

नगरपालिकाले विज्ञप्तिमा थप स्पष्ट पारेको छ कि हालको परिस्थितिमा निर्वाचित जनप्रतिनिधिहरूलाई राजीनामा दिन धम्की र दबाब दिइएको छ, जसका कारण वडा तथा नगरस्तरबाट प्रदान हुने दैनिक सेवा—जस्तै सिफारिस र प्रमाणित कार्य—अवरुद्ध भएको छ। विज्ञप्तिमा भनिएको छ, “नागरिकले पाउने नियमित सेवा अवरुद्ध हुनु अत्यन्तै दुर्भाग्यपूर्ण छ। यसले सर्वसाधारण नागरिकमा असहजता र गुनासो बढाएको छ।” यस्तै, विज्ञप्तिमा नगरपालिकाले जटिल परिस्थितिलाई सहज बनाउन र निर्वाचित जनप्रतिनिधिहरूलाई निर्विघ्न काम गर्ने वातावरण बनाउन सबै पक्षसँग सहकार्य गर्न अपिल गरेको छ। बस्नेतद्वारा जारी विज्ञप्तिमा भनिएको छ, “Gen Z भाइबहिनीहरू, वडा/नगरवासी, आमाबुबा, दाजुभाइ, दिदीबहिनी, राजनीतिक दलका प्रतिनिधि तथा सुरक्षा निकाय सबै मिलेर शान्ति र सहकार्यको वातावरण बनाउन जरुरी छ।” बुद्धभूमि नगरपालिकाले जारी गरेको विज्ञप्तिले एकातिर शान्तिपूर्ण आन्दोलनको अधिकारलाई सम्मान गर्ने प्रतिबद्धता जनाएको छ भने अर्कोतर्फ अराजक गतिविधि नदोहोर्‍याउनुपर्ने स्पष्ट सन्देश दिएको छ।