रसुवामा सुत्केरी फुर्पु यामो र नवजात शिशुको हवाई उद्धार

२१ भदौ, काठमाडौं । रसुवाको आमाछोदिङ्मो गाउँपालिका–३, गत्लाङकी २९ वर्षीया फुर्पु यामो तामाङ र उनका नवजात शिशुको हवाई उद्धार गरिएको छ । फुर्पुले गत्लाङ स्वास्थ्य चौकीमा बच्चा जन्माएकी थिइन् । प्रसूतिपछि आमा र नवजात शिशु दुवैमा जटिल स्वास्थ्य समस्या देखिएपछि थप उपचार आवश्यक परेको थियो । तर, भदौ १० गते भोटेकोशी नदीमा आएको बाढीका कारण आमाछोदिङ्मो गाउँपालिका सडक सञ्जालबाट पूर्ण रूपमा विच्छेद भएपछि उनीहरूलाई तत्काल अन्य स्वास्थ्य संस्थामा लैजान कठिन भएको थियो । अवस्था गम्भीर बनेपछि दुवैलाई हेलिकोप्टरमार्फत काठमाडौं ल्याइएको हो । उनीहरूलाई काठमाडौंस्थित परोपकार प्रसूति तथा स्त्रीरोग अस्पतालमा भर्ना गरी आवश्यक उपचार सुरु गरिएको जनाइएको छ । बाढीका कारण सडक अवरुद्ध हुँदा दुर्गम क्षेत्रका बिरामी तथा सुत्केरीलाई उपचारका लागि बाहिर ल्याउन समस्या भइरहेको छ ।