बाढीपछि काठमाडौं उपत्यकामा एलपी ग्यास अभाव, सरकार वैकल्पिक आपूर्तिमा जुट्यो भन्दै

२४ भदौ, काठमाडौं । हालैको बाढीका कारण आपूर्ति प्रणाली प्रभावित भएपछि काठमाडौं उपत्यकामा खाना पकाउने एलपी ग्यासको अभाव चुलिएको छ। सरकारले भने उपभोक्तालाई सहज रूपमा ग्यास उपलब्ध गराउन वैकल्पिक व्यवस्था गरेको जनाएको छ। उद्योग, वाणिज्य तथा आपूर्तिमन्त्री गौरीकुमारी यादवले तत्काल ग्यास उपलब्ध गराउन सम्बन्धित निकायलाई निर्देशन दिएकी छन्। उपभोक्ताले आफूले प्रयोग गर्दै आएको कम्पनीको ग्यास नपाएमा सोही मूल्यमा अर्को कम्पनीको सिलिन्डर साटेर ग्यास लिन सक्ने व्यवस्था गरिएको छ। मन्त्रालयका अनुसार यो व्यवस्था हाल काठमाडौं उपत्यकामा मात्र लागू हुनेछ। नेपाल आयल निगम र ग्यास उद्योगलाई व्यवस्था प्रभावकारी रूपमा कार्यान्वयन गर्न निर्देशन दिइएको छ। कृत्रिम अभाव सिर्जना गर्ने वा सरकारको निर्देशन उल्लंघन गर्ने व्यवसायीमाथि कानुनबमोजिम कडा कारबाही गरिने मन्त्री यादवले चेतावनी दिएकी छन्।