नेपाल प्रिमियर लिग अन्तर्गत आज सोमबार दुई रोमाञ्चक खेलहरू हुँदैछन्।

नेपाल प्रिमियर लिग (एनपीएल) अन्तर्गत आज सोमबार कीर्तिपुरस्थित त्रिवि क्रिकेट मैदानमा दुई खेलहरू हुँदैछन्। पहिलो खेल दिउँसो साढे १२ बजे काठमाडौं गोर्खाज र कर्णाली याक्स तथा दोस्रो खेल साँझ ५ बजे सुदूरपश्चिम रोयल्स र चितवन राइनोजबीच प्रतिस्पर्धा हुनेछ। पहिलो खेलमा जनकपुरसँग पराजित भई अंकतालिकाको पुछारमा रहेको काठमाडौं पहिलो जितको खोजीमा छ भने लगातार दुई खेल जितेको कर्णाली शीर्ष स्थान बलियो बनाउन चाहन्छ। उता ३ खेलमा १ जित निकालेको सुदूरपश्चिमका लागि आजको खेल महत्त्वपूर्ण छ भने अहिलेसम्म अपराजित रहेको चितवन राइनोज आफ्नो जितको यात्रालाई निरन्तरता दिने लक्ष्यका साथ मैदान उत्रिनेछ।