बुद्धभुमिको फुलकली माध्यमिक विद्यालयमा प्रधानाध्यापक र समितिको गम्भीर लापरबाही

कपिलवस्तु जिल्लाको बुद्धभुमि नगरपालिका ७ डेरवा स्थित श्री फुलकली माविका प्रधानाध्यापक र व्यवस्थापन समितिले विद्यार्थीको भविश्य माथी गम्भीर खेलवाड गरेको छ ।

कक्षा १० सम्म पढाई हुने फुलकली माविका प्रअ चन्द्र राम यादव र व्यवस्थापन समिति अध्यक्ष शुरेस कुर्मीको लापरबाहीका कारण विद्यालय अस्तव्यस्त भएको पाइएको छ ।

अहिले चलिरहेको प्रथम परिक्षामा प्रश्नपत्र नबनाई सेतो पाटीमा २/४ वटा प्रश्न मात्र टिपाउने र सबैलाई एकै ठाँउमा राखेर परिक्षा गराइ अव्यवस्थित परीक्षा प्रणालीले विद्यार्थीहरुको भविष्य माथि खेलवाड र लापरबाही गरेको पाइएको छ ।

त्यति मात्र नभई प्रअ यादवले विद्यार्थीहरु सँग विभिन्न शिर्षकमा रसिदमा मिति र शिर्षक नखुलाइ हजार देखि १२ सय सम्म असुल्ने गरेको तथ्य बाहिर आएको छ ।

स्थानियका अनुसार प्रअ र अध्यक्ष मिलेर सरकारबाट आउने मसलन्द खर्च समेत आफैहरुले खाने गरेको गुनासो छ ।

जबसम्म सम्बन्धित निकायले लापरबाही गर्ने प्रअ, शिक्षक र व्यवस्थापन प्रति नियमित नियमन गर्दैन तबसम्म विद्यालयको शैक्षिक स्तर सुधार हुन नसक्ने र विद्यार्थी संख्या समेत नबढ्ने स्थानियहरुको भनाई छ । पछिल्लो समयमा शिक्षकहरू विद्यालयमा पढाउनेभन्दा राजनीति गर्न मै व्यस्त देखिने गरेको स्थानियहरुको आरोप रहेको छ ।